Nuru Mwasampeta, Pwani

Naibu Waziri wa Madini Doto Biteko amewataka watumishi wa Halmashauri ya Wilaya ya Kisarawe kushirikiana na kampuni ya Rack Kaloin inayojishughulisha na uchimbaji wa madini ya kaolin wilayani humo kwani imeonesha uzalendo kwa kulipa mirabaha ya serikali inavyopaswa pamojana kuwa na ushirikiano mzuri na jamii inayouzunguka mgodi huo sawasawa na taratibu na sheria ya madini inavyoeleza.

Ametoawito huo tarehe 22 mwezi Oktoba alipokuwa katika ziara ya kikazi katika Mkoa wa Pwani wilayani Kisarawe baada ya kutembelea eneo la machimbo ya mgodi huo na kufanya mazungumzo na Mkurugenzi Mtendaji wa kampuni hiyo Adam Ng’imba.

Akielezea dhumuni la ziara hiyo, Biteko alisema ni kukagua shughuli za uchimbaji zinazoendelea pamojana kujiridhisha na suala zima la utunzwaji wa kumbukumbu za uchimbaji nauuzwaji wa madini hayo utakaopelekea Serikali kulipwa kodi stahiki inayotoka na na faida inayopatikana kutokana na uchimbaji na biashara ya madini.

Akizungumzia suala zima la ulipwaji wa mirabaha ya uchimbaji, Biteko alisema mwekezaji anapaswa kulipa kodi hiyo kutokana na kiasi alichokiuza kwenye soko hiyo ikiwa ni pamoja na gharama za usafirishaji kutoka sehemu za machimbo mpaka soko lilipo.

Amesema, awali wawekezaji wa madini walikuwa wakilipa mrabaha kwa gharama ya eneo la machimbo ambapo madini hayo yanaposafirishwa ndipo dhamani yake inaongezeka na kuuzwa kwa gharama ya juu hivyo walikuwa wakiibia Serikali kiasi kikubwa cha pesa.

Aidha, Biteko amekiri kuwa jukumu la kutoa elimu kwa wawekezaji wasiojua taratibu na sheria za kufanya biashara hiyo ni yake baada ya mnunuzi wa madini hayo kubainika kutokuwa na elimu ya kutosha ya kufanya biashara hiyo. “Najua hujui taratibu za kufanya biashara hii, nitakuelimisha kwani hili ni moja kati ya majukumu yangu” alisema.

Akielezea moja ya taratibu anazopaswa kuzifuata mchimbaji au msafirishaji wa madini, Biteko alisema anapaswa kuwa na aidha leseni ya uuzaji wa madini (Dealer licence) au kuwa na leseni ya uchimbaji au zote mbili kwa pamoja.

Kwa upande wake Mkurugenzi Mtendaji wa kampuni ya Rack Kaloin alisema wanaendelea vizuri na kazi za kila siku na kwamba watafanya mazungumzo na wanakijiji ili kuona namna watakavyonufaika moja kwa moja kutokana na uchimbaji huo baada ya kupeleka pesa serikali zamita aambazo matokeo yake kwa wanakijiji wanaozunguka mgodi huo hayaonekani.

Kwa upande wake Katibu Tawala wa Wilaya ya Kisarawe, Mtela Mwambapa amemshukuru Biteko kwa kutembelea Wilaya hiyo na kwa maelekezo aliyoyatoa na kuahidi kuwa halmashauri yake itaendelea kushughulikia changamoto mbalimbali za sekta ya madini ili waweze kuwa na uzalishaji mzuri na wenye tija kwa wawekezaji na serikali kwa ujumla.

Akikamilisha ziara hiyo Biteko alitoa wito kwa wachimbaji wadogo na wanakisarawe kwa kusema waendelee kushirikiana na ofisi za madini kwani kazi ya Serikali ni kuwafanya wachimbaji hao kukua na kuwa na uchmbaji wenye tija. “Kazi yetu sisi kazi yetu ni kuwalea wao waweze kuchimba kwa kufuata sheria lakini zaidi sana kuwafanya wawe wachimbaji wanaokua kutoka uchimbaji mdogo, wa kati na baadaye kuwa wachimbaji wakubwa.”

Aidha, alitoa wito kwa halmashauri ya Kisarawe kisarawe kuwapa ushirikiano wa kutosha wachimbaji na kwamba wawalee na wao kwani hakuna sababu yoyote ya kuwa na migogoro kila mahali lakini pia wachimbaji wasiwanyonge wala kuwanyonya wanakisarawe isipokuwa wazingatie taratibu zilizowekwa.