Tarehe : Nov. 7, 2025, 4:01 p.m.

Dodoma

Chama cha Wafanyakazi wa Serikali Kuu na Afya (TUGHE) Tawi la Wizara ya Madini Makao Makuu limefanya uchaguzi wa kujaza nafasi zilizokuwa wazi za uongozi, kufuatia baadhi ya viongozi wake kuhamishwa kwenda taasisi nyingine za serikali.

Uchaguzi huo umefanyika leo, Novemba 7, 2025, katika Ukumbi wa Mikutano wa Wizara ya Madini, Mtumba jijini Dodoma, ambapo wanachama wa chama hicho wamejitokeza kwa wingi kushiriki zoezi hilo la kidemokrasia.

Akizungumza baada ya uchaguzi, Mwenyekiti wa TUGHE Tawi la Wizara ya Madini, Joseph Ngulumwa, amesema, uchaguzi huo umefanyika kwa uwazi, haki na amani kubwa. Ameongeza kuwa viongozi wapya wana jukumu la kuendeleza misingi ya chama, kulinda haki za wafanyakazi na kuhakikisha wanachama wote wanapata huduma bora.

“TUGHE ni chama cha umoja na mshikamano. Leo tumeonesha mfano bora wa demokrasia. Tuna imani viongozi wapya wataendeleza kasi ya utumishi na uwajibikaji,” amesema Ngulumwa.

Katika matokeo ya uchaguzi huo, Joseph Makwinya amechaguliwa kuwa Katibu wa Tawi, Nyachibula Muhoji amechaguliwa kuwa Mhasibu wa Tawi, huku Dorice Kagya akishinda nafasi ya Mjumbe wa Halmashauri ya Tawi.

Akizungumza baada ya kutangazwa mshindi, Joseph Makwinya, Katibu mpya wa Tawi, ameahidi kushirikiana na uongozi wote kuhakikisha chama kinaendelea kuwa sauti ya wafanyakazi ndani ya Wizara ya Madini.

“Nashukuru kwa imani kubwa mliyonionesha. Nitaendelea kusimamia maslahi ya wanachama wote kwa uwazi, ushirikiano na uwajibikaji,” amesema Makwinya.

Kwa upande wake, Nyachibula Muhoji, Mhasibu mpya wa Tawi, amesema kuwa ataweka mkazo katika usimamizi mzuri wa fedha za chama na kuhakikisha taarifa za kifedha zinatolewa kwa uwazi.

“Tutahakikisha kila senti ya chama inatumika kwa manufaa ya wanachama. Uwajibikaji wa kifedha ni msingi wa uongozi bora,” amesema Muhoji.

Naye, Dorice Kagya ambaye amechaguliwa kuwa Mjumbe wa Halmashauri ya Tawi, amesema kuwa atatumia nafasi yake kusikiliza na kuwasilisha kwa ufanisi maoni ya wanachama kwenye ngazi za juu za chama.

“Ninaamini katika nguvu ya ushirikiano. Nitakuwa daraja la mawasiliano kati ya wanachama na viongozi wetu,” amesema Kagya.

Kwa ujumla, uchaguzi huo umefanyika kwa  amani na umoja, huku wanachama wengi wakieleza kuridhishwa na utaratibu uliotumika.

Uongozi wa TUGHE Tawi la Wizara ya Madini umeahidi kuendelea kuimarisha umoja na mshikamano miongoni mwa wanachama wote, huku ukisisitiza umuhimu wa kila mwanachama kushiriki kikamilifu katika shughuli za chama.

“Nguvu ya chama chetu ipo kwa wanachama wake. Tukiwa wamoja, hakuna changamoto itakayotushinda. TUGHE imara, mfanyakazi hodari!” Amesisitiza Katibu wa Wanawake Tawi la Madini, Elieth Mathias.

Kwa pamoja, wanachama wametakiwa kuendelea kuwa mfano wa kuigwa katika utumishi wa umma, wakisimamia haki, uwajibikaji na uadilifu kazini.

by: madini